വിപ്ലവകാരി

വെയിലേറ്റ് നനയുന്നവനും
മഴയേറ്റ് ഉണങ്ങുന്നവനുമാണ് 
വിപ്ലവകാരി

പ്രണയം

എങ്ങനെയാണ് ഒരു പ്രണയത്തില്‍ നിന്ന് ഒളിച്ചോടുക
കയ്പു തികട്ടുന്ന ജീവിതരസം പേറിയിട്ടും
നെല്ലിക്കചവര്‍പ്പു പോലെ പ്രണയം വീണ്ടും മധുപകരുന്നു
ദൈവമേ, നീ അനുരാഗത്തിന്റെ വിത്ത് വിതച്ചത് അവളിലാണെങ്കിലും
അത് പടര്‍ന്ന് പന്തലിച്ചത് എന്നിലാണല്ലോ
പ്രണയത്തില്‍ നിന്നുള്ള ഓരോ ഒളിച്ചോട്ടവും
പ്രണയത്തിലേക്ക്  തന്നെയുളള തിരിച്ചുനടത്തമാണ്‌

നരി

അമ്മേ...പേടിയാവുന്നു
രാത്രിയിരുളുമ്പോള്‍
വാതില്‍ തുറന്നു നരി വരുന്നു
ദൈവങ്ങളെ വിളിച്ചു മൂടിപ്പുതച്ചിട്ടും
പമ്മി മണം പിടിച്ചെത്തി
പുതപ്പിനുള്ളില്‍ നുഴഞ്ഞു കയറുന്നു
ഇനി വരുമ്പോള്‍ ഒച്ചവെക്കൂ
പേടിക്കേണ്ട അച്ചനുണ്ടെന്നമ്മ
രാത്രിയിരുളി നരി വന്നു
ഒച്ചയുയര്‍ന്നു അമ്മ വന്നു
ഇരുളില്‍ പുതപ്പിനുള്ളിലെ നരിയിറങ്ങി
രണ്ടു കാലില്‍ നിന്നമ്മയോടെന്തോ ചൊല്ലി
അച്ഛന്റെ വാതില്‍ തുറന്നു കതകടച്ചു

മുങ്ങാം കുഴി

മടുപ്പിന്റെ ചൂരടിച്ചപ്പോള്‍
ബാല്യത്തിലേക്ക് ഒരു മുങ്ങാം കുഴി
വക്കു പൊട്ടിയ സ്ലൈറ്റ്
കല്ല്‌ ചുംബിച്ച മാങ്ങ
നൂലറ്റ പട്ടം
പാതി നിറഞ്ഞ തൊണ്ട്
മൂന്നു ഗോട്ടി ഒരു കെട്ടുപന്ത്
ഇത്രയേ തടഞ്ഞുള്ളൂ ...
 ചൂരകന്നു ...

ബോംബിന്റെ ജാതി

നിങ്ങളുടെ  പൊട്ടിത്തെറികള്‍ക്കിനി
ഞങ്ങളുടെ തൊപ്പിയും താടിയും വരക്കരുത്‌
ഇനിയും ഉണങ്ങിയിട്ടില്ല
പണ്ട് പൊട്ടിയ ബോംബിന്റെ ജാതിയില്‍
ജയിലില്‍ ഛര്‍ദ്ധിച്ച ചോരപ്പാടുകള്‍
ചിതറിപ്പോയ ഉടലിന്റെ
മതമന്യേഷിക്കുന്ന
പ്രിയ പത്രക്കാരാ ...
വയ്യ ഇനിയും
മറ്റുളവരുടെ പാപം പേറുവാന്‍
റിക്ഷ വലിച്ചും വിറക് വെട്ടിയും
ഊര്‍ദ്ധം വലിച്ചോട്ടെ

ഈ മണ്ണ്  പെറ്റ ജീവിതങ്ങള്‍

വിമതന്‍

ഒറ്റപ്പെട്ട സ്വരങ്ങള്‍ ഒളിച്ചോടുന്നത്
ആള്‍ക്കൂട്ടാരവങ്ങളുടെ
നിയമാവലികളില്‍ നിന്നാണ്
പൂരം കഴിഞ്ഞു , ആളൊഴിഞ്ഞു
പാടം ശൂന്യമാവുമ്പോള്‍
തിരിച്ചു വന്ന ബോധവും
ശൂന്യമായ പോക്കറ്റും
ഒറ്റപ്പെട്ടു പോയവന്റെ മുന്നറിയിപ്പുകളെ
തപ്പിയെടുക്കും
അപ്പോഴും മറ്റൊരാള്‍ക്കൂട്ടത്തില്‍
അതെ സ്വരം നാട് കടത്തപ്പെടുന്നുണ്ടാകും

ശരീരത്തിന്റെ നിലവിളി

വേവുന്ന വേനല്‍ചൂടില്‍
പുറത്തു ഉണങ്ങാനിട്ട
ശരീരത്തിന് തീ പിടിച്ചു
അകത്തു തീ കായുകയായിരുന്ന
നനഞ്ഞൊട്ടിയ വസ്ത്രങ്ങള്‍
നിലവിളിയോടെ പുറത്തേക്കു ചാടി

നമ്മളും അവരും

നമ്മള്‍ ,അവര്‍
അവര്‍ ,നമ്മള്‍
അവരങ്ങനെയാ
നമ്മളിങ്ങനെയും.
നമ്മള്‍ അവരാവരുത്.
അവര്‍ നമ്മളാവണം
അങ്ങനെ അവരെല്ലാം
നമ്മളായി.
അവരില്ലതെന്തു നമ്മള്‍ ?
ചിന്ത പിന്നെ ഇങ്ങനെയായി.
അങ്ങനെ നമ്മള്‍
നമുക്കുള്ളില്‍ അവരെ കണ്ടു.
ഇങ്ങനെ അവരും നമ്മളും
നമ്മളും അവരും തുടരുന്നു...

തിരുകേശം

സ്വപ്നത്തിലിന്നലെ ഉമറിനെ കണ്ടു

കയ്യില്‍ ഊരിപ്പിടിച്ച വാളുണ്ടായിരുന്നു

മുഖം ചുവന്നു തുടുത്തിരുന്നു

കണ്ണുകളില്‍ തീ പാറുന്നുണ്ടായിരുന്നു

"അബൂബക്കര്‍ ......അബൂബക്കര്‍ "

വിളി ഉച്ചത്തിലായിരുന്നു

അല്ലാഹ് ..അബൂബക്കറിനെന്തു പറ്റി?

ഉറക്കത്തിലെന്റെ സംശയം ചോദ്യമായി

"മുത്തു റസൂലിന്റെ ഞാന്‍ കാണാത്ത

മുടി നിനക്കെവിടെ നിന്ന് കിട്ടി ?"

ആദ്യമുയര്‍ന്നത്‌ വാളോ ചോദ്യമോ ?

വീണത്‌ മുടിയോ തലയോ ?

ഞെട്ടിയുണര്‍ന്നത് മാത്രമേ ഓര്‍മ്മയുള്ളൂ...

e -മെയ്ല്‍

e ബാദത്ത് ഉപേക്ഷിച്ചാല്‍ 
e മാന്‍ പോകുമെന്ന് 
e സുഹൃത്തിനു 
e മെയ്ല്‍ അയച്ചതായിരുന്നു
e ന്നലെ അവര്‍ വീട്ടില്‍ വന്നു 
e മാന്‍ ആര്? ഒരു ചോദ്യം മാത്രം.
e ന്ന് രാവിലെ പത്രത്തില്‍ 
e മെയ്ല്‍ ഐഡി കണ്ടപ്പോഴാണ് 
e ന്നലത്തെ ചോദ്യം മനസ്സിലായത്.

ബാല്യകാല സഖി

കുട്ടിക്കാലത്തെ  ഒളിച്ചുകളികള്‍

അവധികാലത്തെ വേനല്‍തുമ്പികള്‍

മഴക്കാലത്തെ മുങ്ങാംക്കുഴികള്‍

മാമ്പഴക്കാലത്തെ മരക്കൊമ്പുകള്‍

പരീക്ഷക്കാലത്തെ പകര്‍ച്ചപ്പനികള്‍

എല്ലായിടത്തും  അവള്‍ കൂടെയുണ്ടായിരുന്നു.

ഇടക്കാലത്തെപ്പോഴോ  അവള്‍ പെണ്ണായത്.

പെണ്‍ക്കാലം തൊട്ടാണ്  ഞാനവള്‍ക്കന്യയായത് .

യത്തീം

ഉപ്പ മരിച്ച മൂന്നാം ദിവസമാണ്

നിവര്‍ന്നു നിന്നാല്‍ തല മുട്ടുന്ന

വീട്ടിലേക്ക് ഖാളിയാര്‍ വന്നത്.

ബിസ്മിയും സ്വലാത്തും കഴിഞ്ഞ്

വയര്‍ തടവി പുറത്തിറങ്ങുമ്പോള്‍

ഖാളി എന്നെ അടുത്തു വിളിച്ചു

"മോനിപ്പോ യതീമാണ്,

വല്ലവരും വല്ലതും തരണമെങ്കില്‍

അസര്‍ മുതല്‍ ഇശാ വരെ

പള്ളിയില്‍ കിതാബോതണം"

പിറ്റേന്ന് വെള്ളത്തുണിയും തൊപ്പിയുമിട്ട്

പള്ളിയിലേക്ക് പോകുമ്പോഴാണ്

ഖാളിയാരുടെ മകന്‍ സൈക്കിളുമായി

വഴിയില്‍ വിലങ്ങു നിന്നത്.

"അടിപൊളി സിനിമയാ പോരുന്നോ.."

കാലിടറി ...കണ്ണുകള്‍ ഇറുക്കിയടച്ചു

അന്ന് പള്ളിയില്‍ ഖുറാനോതുമ്പോഴും

മനസ്സ് ഖാളിയുടെ വീട്ടിലെ ടീവിയിലായിരുന്നു.

2012

ഒടുവിലത്തെ ഒന്നു മാറി  
രണ്ടു വന്നു .
രണ്ടെണ്ണം പൊട്ടിച്ചു 
നാമതാഘോഷിച്ചു .

മുത്തലാഖ്

ഉപ്പയുടെ നാവില്‍ നിന്നുതിര്‍ന്ന 
മുത്തലാഖിന്‍റെ  മൂര്‍ച്ചയിലാണ് 
പതിനെട്ടാം വയസ്സില്‍ 
ഉമ്മ വിധവയായത്.
ഒറ്റ മൊഴിയില്‍ മൂന്നും ചൊല്ലിയതിന്
മൂന്നു നാള്‍ കഴിഞ്ഞു 
ഉപ്പ ഖേദിച്ചുവത്രെ.
ദീനില്‍ പഴുതില്ലെന്നു ഫത്‌വ  ചൊല്ലി 
ഖാദി  മുസ്ഹഫ് മടക്കി വെച്ചു.
ഒന്നും മൂന്നും വയസ്സായ 
ഞങ്ങള്‍ രണ്ടു പേര്‍ക്ക്  
ഉപ്പ മാസത്തിലൊരിക്കല്‍  
അയല്‍പ്പക്കത്തെ എരഞ്ഞിമരചുവട്ടിലെ 
അഞ്ചു മിനിട്ട് ഒളിച്ചുക്കളിയായതങ്ങനെയാണ് .

ഉമ്മ

പൂമുഖത്ത് കത്തിച്ചു വെച്ച 
സ്നേഹത്തിന്‍റെ മെഴുകുതിരി.
സ്വയം ഉരുകി തീരുമ്പോഴും 
എനിക്ക് ചുറ്റുമുയരുന്ന 
ഇരുട്ടിനെ കുറിച്ചായിരുന്നു
നിലച്ചു പോവാത്ത 
വേവലാതി.

വെള്ളത്തണ്ട്

 എന്‍റെ സ്ലൈറ്റിലെ
 വള്ളിയും പുള്ളിയും മായ്ക്കാന്‍
 വെള്ളത്തണ്ട് പറിക്കാന്‍
 പോയതായിരുന്നു അവന്‍  .
 "വെള്ളിക്കെട്ടനാണെന്ന് തോന്നുന്നു"         
 വെള്ള തുണിയില്‍  പൊതിഞ്ഞു
 പള്ളിക്കാട്ടിലേക്കെടുത്തപ്പോള്‍
 വെള്ളത്തണ്ടുമായി
 ഞാന്‍ മുന്നിലുണ്ടായിരുന്നു.
 ഇന്നലെയും ഞാന്‍ കണ്ടിരുന്നു 
 മീസാന്‍ക്കല്ലില്‍
 കള്ളിചെടികള്‍ക്കൊപ്പം
 ഒരു വെള്ളത്തണ്ട് 
 എന്നോട് ചിരിക്കുന്നത്. 

പെങ്ങള്‍

 പുര നിറഞ്ഞപ്പോഴാണ്‌

 പുറത്തേക്കിറങ്ങിയത്.

 പിന്നെ അകത്തേക്ക്
 പടി കയറി വന്നിട്ടില്ല.
 പുരയില്‍ വന്നൊരാളും
 പെണ്ണ് കാണാത്തവളെ
 പകലില്‍ പോലും
 പലരും കണ്ടു മടങ്ങുന്നു.

പിന്‍ബെഞ്ചിലെ കുട്ടി

ഓര്‍മ്മയുടെ പിന്‍ബെഞ്ചില്‍
രണ്ടാം ക്ലാസിലെ കുട്ടി കരയുകയാണ്.
കുട്ടികളെല്ലാം ചുറ്റും ചിരിക്കുന്നു.
രണ്ടില്‍ നിന്നും ഒന്ന് പോയാലെത്ര?
ചോദ്യമുന വീണ്ടും കൂര്‍ത്തു വന്നു.
കണക്കുമാസ്റ്റര്‍ വടി ചുഴറ്റുന്നു.
ഒന്നിനും രണ്ടിനും മുട്ടി .
ഉത്തരം മാത്രം പുറത്തു വന്നില്ല.
രണ്ടില്‍ നിന്ന് ഒന്ന് പോയാല്‍ ....ശിഷ്ട്ടം?
വടി വീണ്ടുമുയര്‍ന്നു .
ആദ്യം പോയത് ഒന്നായിരുന്നു.
പിന്നെ ശിഷ്ട്ടവും .

പ്രണയം

മഴ നനഞ്ഞ ഒരു നോട്ടമാണെന്നെ

കാമുകനാക്കിയത്.

നാണം കുണുങ്ങിയുള്ള

ഒരു ചാറ്റല്‍ മഴയെ

ആരാണ് പ്രേമിച്ചു പോകാത്തത് .

രാജ്യദ്രോഹം

കൂരിരുട്ടില്‍ പുലരുവാന്‍ പോകുന്ന

പകല്‍വെളിച്ചത്തെ

സ്വപ്നം കണ്ടതിനാണവരെന്നെ

രാജ്യദ്രോഹിയാക്കിയത്.

ഇപ്പോള്‍ നട്ടുച്ചയ്ക്ക് ഉണര്‍ച്ചയില്‍

ഞാന്‍ കാണുന്ന യാഥാര്‍ത്യങ്ങള്‍

രാത്രിയിലെന്‍റെ ഉറക്കം കെടുത്തുന്നു.

കിനാവിന്‍റെ പേറ്റന്‍റെമായി വന്നു

സ്വപ്നത്തിന്‍റെ നൂല്‍പ്പാലത്തില്‍ നിന്ന്

എപ്പോഴാണ് അവരെന്നെ താഴേക്കു തള്ളിയിടുക.