ബോംബിന്റെ ജാതി

നിങ്ങളുടെ  പൊട്ടിത്തെറികള്‍ക്കിനി
ഞങ്ങളുടെ തൊപ്പിയും താടിയും വരക്കരുത്‌
ഇനിയും ഉണങ്ങിയിട്ടില്ല
പണ്ട് പൊട്ടിയ ബോംബിന്റെ ജാതിയില്‍
ജയിലില്‍ ഛര്‍ദ്ധിച്ച ചോരപ്പാടുകള്‍
ചിതറിപ്പോയ ഉടലിന്റെ
മതമന്യേഷിക്കുന്ന
പ്രിയ പത്രക്കാരാ ...
വയ്യ ഇനിയും
മറ്റുളവരുടെ പാപം പേറുവാന്‍
റിക്ഷ വലിച്ചും വിറക് വെട്ടിയും
ഊര്‍ദ്ധം വലിച്ചോട്ടെ

ഈ മണ്ണ്  പെറ്റ ജീവിതങ്ങള്‍

വിമതന്‍

ഒറ്റപ്പെട്ട സ്വരങ്ങള്‍ ഒളിച്ചോടുന്നത്
ആള്‍ക്കൂട്ടാരവങ്ങളുടെ
നിയമാവലികളില്‍ നിന്നാണ്
പൂരം കഴിഞ്ഞു , ആളൊഴിഞ്ഞു
പാടം ശൂന്യമാവുമ്പോള്‍
തിരിച്ചു വന്ന ബോധവും
ശൂന്യമായ പോക്കറ്റും
ഒറ്റപ്പെട്ടു പോയവന്റെ മുന്നറിയിപ്പുകളെ
തപ്പിയെടുക്കും
അപ്പോഴും മറ്റൊരാള്‍ക്കൂട്ടത്തില്‍
അതെ സ്വരം നാട് കടത്തപ്പെടുന്നുണ്ടാകും